नेपालका लागि भारतका राजदूत नवीन श्रीवास्तवले राष्ट्रिय समाचार समितिको तस्बिर प्रदर्शनीले नेपालका पर्यटकीय गन्तव्यहरुको भ्रमण गर्न आफूलाई प्रेरित गरेको बताउनुभएको छ ।
‘गणतन्त्र दिवस २०८२’ का अवसरमा राससले केन्द्रीय कार्यालयमा आयोजना गरेको ‘पर्वतीय पर्यटनः हाम्रो शान, हाम्रो पहिचान’ विषयको तस्बिर प्रदर्शनीको आज अवलोकन गर्दै राजदूत श्रीवास्तवले प्रदर्शित तस्बिरमा कुनै–कुनै स्थान आफूले घुमेको र प्रदर्शनी हेरिसकेपछि नेपालका अन्य भूभाग पनि घुम्न प्रेरित गरेको बताउनुभयो ।
“हिमाल र साहसिक गन्तव्यबारे गरिएको फोटो प्रदर्शनी धेरै महत्वपूर्ण छ,” राजदूत श्रीवास्तवले भन्नुभयो, “तस्बिरमध्ये केही–केही ठाउँहरु मैले घुमेको छु । यी तस्बिरले मलाई अझ नेपाल घुम्न प्रेरित ग¥यो ।” भारतीय राजदूत श्रीवास्तवले नेपालका हिमालहरु ९सर्वोच्च शिखर सगरमाथासहितका विभिन्न हिमाल० समेटिएको तस्बिर प्रदर्शनी अत्यन्तै महत्वपूर्ण रहेको पनि बताउनुभयो । उहाँले तस्बिर प्रदर्शनीको माध्यमका आन्तरिक र बाह्य पर्यटन प्रवद्र्धनमा टेवा पुग्ने विश्वास व्यक्त गर्नुभयो ।
राजदूत श्रीवास्तवले आफ्नो पहिलो पटक रासस भ्रमण भएको र यहाँ आएर फोटो प्रदर्शनीसहित राससको विविध सेवाबारे जानकारी लिन पाउँदा निकै खुसी लागेको बताउनुभयो । उहाँले भन्नुभयो, “यो मेरो पहिलो पटक राससको भ्रमण हो, महत्वपूर्ण प्रदर्शनीले पर्यटकलाई प्रोत्साहित गर्छ ।”
राजदूत श्रीवास्तवले रासस नेपालको स्थापित समाचार संस्था भएको उल्लेख गर्दै नेपालले भारतको पिटिआई, एएनआईलगायत विश्वका अन्य समाचार संस्थासँगको सहकार्यलाई अझ बलियो बनाएर लैजानुपर्ने धारणा राख्नुभयो । उहाँले दुई देशका सरकारी समाचार संस्थाहरुको सम्बन्ध बलियो बनाउँदै पत्रकारहरुबीचको सहकार्यलाई फराकिलो बनाएर लैजानुपर्नेमा जोड दिनुभयो ।
त्यसअघि राजदूत श्रीवास्तवलाई राससका कार्यकारी अध्यक्ष धर्मेन्द्र झा, महाप्रबन्धक सिद्धराज राई, प्रधानसम्पादक उत्तम सिल्वाल लगायत राससकर्मीले स्वागत गर्नुभएको थियो ।
कार्यकारी अध्यक्ष झाले प्रदर्शित तस्बिरहरुको सङ्क्षिप्त रुपमा व्याख्या गर्नुभएको थियो । सर्वोच्च शिखर सगरमाथासहितका हिमाल, प्रसिद्ध हिमाली क्षेत्र र साहसिक गन्तव्यलाई समेटेर रासस केन्द्रीय कार्यालयमा यही जेठ ११ गतेदेखि तस्बिर प्रदर्शनी आयोजना गरिएको छ ।
राससका कार्यकारी अध्यक्ष झाले रासस कार्यालयमा आएर तस्बिरहरुको प्रदर्शनी अवलोकन गरेकामा राजदूत श्रीवास्तवलाई धन्यवादज्ञापन गर्नुभयो । उहाँले राससको विस्तारित समाचार सेवा, मिडिया सङ्ग्रहालय, समाचार कक्ष तथा पुस्तकालयको व्यवस्थित र प्रभावकारी रुपमा सञ्चालनका लागि आवश्यक सहकार्यबारे पनि राजदूतसँग कुराकानी गर्नुभएको थियो ।
अध्यक्ष झालेसमाचार उत्पादनसँगै संस्थागत सामाजिक उत्तरदायित्वअन्तर्गत राससले देशका हिमाल–पर्वतलाई राष्ट्रिय र अन्तरराष्ट्रिय रुपमा प्रचारप्रसार गर्न तथा समग्र पर्यटन प्रवद्र्धन गर्ने उद्देश्यले तस्बिर प्रदर्शनी आयोजना गरिएको बताउनुभयो ।
